Муфтий ҳазрат ташрифидан ўксик кўнгиллар кўтарилди

159

Пайғамбаримиз Муҳаммад соллаллоҳу алайҳи ва саллам: “Ибодатдан кейинги энг афзал амаллардан бири – мўминлар қалбига хурсандчилик улашиш”, деб марҳамат қилганлар.
Ҳақиқатан ҳам, бир инсонга яхшилик қилиб, унинг кўнглини кўтариш, руҳий тасалли бериш – динимизда ажри улуғ амал ҳисобланади. Мана шундай ҳикматни ўзига шиор қилиб олган Ўзбекистон мусулмонлари идораси савобли ишлар қилишда давом этмоқда.
Наманган вилоятида хизмат сафарида бўлиб турган муфтий Усмонхон Алимов ҳазратлари Наманган вилояти бош имом-хатиби Абдулҳай Турсунов, туман бош имом-хатиби Шокиржон Мансуров ҳамда туман ДХХ раҳбари Орифжон Хомидов ҳамроҳлигида Учқўрғон тумани Нуробод кўчасида истиқомат қилувчи Зокиржон Саиталиевнинг хонадонига ташриф буюришди.
Маълум бўлишича, Зокиржон Саиталиев қарийб 20 йилдан буён жазони ижро этиш муассасасида сақланмоқда. Унинг рафиқаси Тожихон Саиталиева юртимиздаги ижобий ўзгаришлар натижасида, эри қаттиқ тартибли колониялардан манзиллисига ўтказилганини айтиб, эндиликда турмуш ўртоғи авфнома ёзгани, давлатимиз Раҳбарининг оқилона ислоҳотлари натижасида, турмуш ўртоғининг озодликка чиқишига умидвор эканини айтди. Шунингдек, Тожихон Саиталиева ўтган давр мобайнида жуда қаттиқ қийинчиликларни бошидан ўтказгани, диёримизда аҳоли манфаатларини ўйлаб амалга оширилаётган хайрли ишлар кўнглини ёриштиргани, айниқса, мана шундай дин пешволари ва мутасадди шахсларнинг унинг хонадонига ташриф қилишлари катта хурсандчилик бахш этганини кўзида ёш ила сўзлади.
Шундан сўнг, муфтий ҳазратлари муҳтарам Президентимизнинг халқ дардини ўйлаб, олиб бораётган доно сиёсатлари натижасида, қилган қилмишига чин кўнгилдан пушаймон бўлган, жиноятни билиб-билмай содир этган, тўғри йўлга қатъий ўтган маҳкумларнинг авф этилаётганини тушунтириб, Саиталиев Зокиржоннинг ҳам яқин кунларда озодликка чиқишини Яратган Парвардигордан сўраб дуолар қилдилар. Шунингдек, хонадон аҳлларига тасалли бериб, уларнинг кўнглини кўтарадиган илиқ сўзларни айтдилар.

Ўзбекистон мусулмонлари идораси Матбуот хизмати